ما أعرفش ليه ...
ناجي العلي ملازمني دايماً ؟!!
وساعات بنادي حنظلة ..
فيرد " يا ميت .. ما فيش ف النومة معنى للتعب "
خبوا الأدب ..
ف الكُم ..
أو ف الفم ..
أو قراطيس ..
بيعوا السخافة ..
لحاوي غاوي ينط طوق النار عشان يثبت ..
قانون الكتلة والمادة ..
وينزع تفاحات إبليس ..
ويرميها ف حضن نيوتن المربوط بخيط الأرض بين أقواس ( ردود الفعل تتناسب ف قوتها لكن دايما بتبقى مضادة للأفعال ف قوانينها )
يمينها ... يسار
يسارها ... يمين
ما فيش منطق ..
دليل واحد على صدق الإله حتحور ..
تلف .. تدور
موحدها زمان مينا ..
مفرقها زمان خونانوب ..
هَتك عِرض الخريطة مشاع ..
وقال مساحات ..
محيط الذات مع البشوات وبرتوكولات بتوع الريش ..
على واقع نجيب محفوظ يساوي الفجوة بين شفاعات وسي السيد ..
وتقدير الوطن جيد ..
نقول فوسفات ..
وتعلب فات ..
وخالتي فرنسا والسبكي ..
نشيل محفوظ نحط سرور ..
عليكي الدور يا طُراحة ..
فشدي الحبل بالراحة ..
وردي الضحكة بالإيحاءات ..
هنا إثبات ..
جنون الراوي للمشهد ..
ساعة سرد الثبات ..
من منطقة سارتر ف كتابة النهايات على خرافات مدارس ف الكتابة السَيْكو ..
انت مريض !!!
- مريض بالشِعر متأثر بعشق نزار .. هروب درويش من المنفى .. دخول دنقل دروب الموت .. وداع جبران لــ مي زيادة في الجوابات .. جنون لوركا .. وأنا وانت ورقص كل أشعاري على أد المدارس نقد ..
بداية النص عن ناجي ..
وأنا غرقان ..
ضلوعي المزحومين فوضى كتير عاثوا فساداً ف الحروف والوزن ..
لكن دايما بتغلبني وتكتبني هوامش شِعر ..
حدود الهامش الأول :-
كتب مغلوطة بالتواريخ ..
عرابي الفلاحين باشا
مافيش فايدة ولا زغلول !!!
خلاصة القول ..
كتبت قصيدة من قهري بدون معنى لكن طبعاً هتعجبكم !!!
