قولون الشعر : لـ | وليد حمدي اسرائيل

- 1 -
المعنى ف بطن الشاعر ..
والشاعر دايماً بيخاف ..
ف يجيله القولون العصبي ..
وساعات المعدة بتتضايق ... من كام معنى مش مفهوم !!!
- 2 -
زانتاك ..
نوع من أدوية المعدة اللي مخليني أستحمل وجع الحرف ..
قبل الشِعر 3 مرات ..
أثناء الوزن ،،
وف نص التراكيب بالظبط ..
بسحب حبيتين م العلبة وبقرر إني أكمِّل موت !!!
- 3 -
سبازمو ..
ديجستين تقريباً ..
دا بيهضم نص اللي كتبته ..
ويوسع سكة لآخر سطر ..
لكن ،،
تقريباً مفعوله ضعيف ..
ما بيستحملش العتمة ف نصي ..
ويزغلل عيني بلون العلبة عشان ما كتبش !!!
- 4 -
كونترولوك ،،
بيساعد على قفل مسام الهنة ..
ويقلل أحماض المعدة عشان تفرز من نصك تصاوير ..
يمكن ف تمنها الغالي ..
فايدة بجد ،،
يمكن تتآخد قبل الأكل عشان تفتح للمعدة معاني جديدة ..
عقلك يقدر يكتبها !!!
- 5 -
جانتوليف ..
30 قرص مغلف لعلاج القرحة ..
بيساعد على هضم الحزن ..
ويجمَّع ف خلايا الفرحة ..
ويكون منك شخص جديد ..
بارد جداً ،،
تسمحلي أشرح ..
المعنى ف بطن الشاعر ..
والشاعر دايماً موجوع !!!!