ربط الكتابة بسحر سفلي : لـ | وليد حمدي اسرائيل

إزاي تخاف ؟!!

وانت اللي رتبت القصيدة بدون محاولة مع الميزان ..

الإختلال ..

والهنة ..

والفصل السماعي ..

ف وسط روحك ..

خلى بوحك ع الإيقاع بره المازورة ..

مرسومة صورة ع الجدار ..

وقت الهزار ويا النصوص ..

كان الضمير معطوف على ..

حرفين بساط بيهزوا عرش المحتمل ..

بيجروا عمرك للحنين ..

ويقدمولك ورد وبطاقة ..

كارتين معايدة معطريين ..

فيهم أنا ..

الأصل والنسخة الشيطان ..

السبحة والجرنان ..

الدعوة والشطحات ..

كل الملايكة بيهتفوا ..

قلبك حجر ..

وكتير كفرت بمعجزات الناس ..

قدرة الإبداع على التوليد ..

جمر العدم ..

ربط الكتابة بسحر سفلي ..

عشان تعدي المرحلة بين الورق والتكتكة ع الفيس !!!