مع فنجان القهوة التالت ،،
يبتدي إحساسك باللذة وبطعم البن يروح ،،
فتلاقي الفنجان مجروح ،،
حاسس بالوحدة معاك ،،
وإيديك ،،
مش قادرة تدفي الفايض فيه ،،
البن متلج ،،
الوش ،،
ابتدى يتسحب بالراحة ،،
والتحويجة ،،
اللي لسانك متعود إنه يدوقها ،،
ما بقتش بستطعم روحك ،،
وشك زي الفنجان ،،
تقراه بسهولة العرافة ،،
وصحابك ،،
هما رواسب فنجانك ،،
دايماً ماسكين ف الآخر ،،
وانت ،،
كل ما تبعد ترجع ليهم ،،
وتدوق ،،
معلقتين إمبارح ،،
وتدوب بكرة ف قلبيهم ،،
فتلاقي اللحظة ف صورة خوف ،،
الكنكة بتغلي وهتفور ،،
على مين الدور ،،
إنه يفوتك ؟!!!
على مين الدور ؟!!!
