آه وحشتيني .. لكني
مش هاموت من غير تلاقي
عايز اقابلك ..
بس لاجل الميا ترجع للسواقي
المطر مابقاش بينزل ..
المطر طالع لفوق و الشمس خايفة
طمنيها .. و احضري .. ينزل عشانك
نفسي أفهم ..
انتي لسة ازاي لحد اللحظة دي مش عارفة شانك ؟
كوكب الأرض ف شتاه .. بيلاقي دفئه
لما تتغطي بشيلانك
كوكب الأرض التعيس بيلاقي ضحكه..
لما ضي الشمس يلمع فوق سنانك
انقذيه من كل حاجة .. كل حاجة .. ده أوانك
يا جميلة ف كل أمر ..
لو ما جودتيش النهاردة بالعطايا
كل طفل ف كل حتة ..
هايطعموه علقم و جمر
لمسة منك ..
العنب هايتوب و يكره إنه وافق يبقى خمر
الحكاية مش مجرد بس شاعر
كل إلهامه بنورك
النهاردة الكون بحاله ..
في إنتظار لحظة حضورك
اوعي بالله تخذليه
لما تيجي ..
فيه ولد مسكين .. بيبكي
ماسك الدفتر ف إيده
دمه ناشف في وريده
إبقي حني .. و بصي من فضلك عليه
