ليه عاوزنى اتجسد فى مسيح : لـ | وليد حمدي اسرائيل

ليه عاوزنى دايما م اغلطش
وان حتى حزنت ما اعيطش
ليه عاوزنى اتجسد فى مسيح
ليه عاوزنى أكون زى إله
ف عذابى وكتر التجريح
ما اصرخشى ولا اقول الآه
وايديا اتمدت بسلام
بيغطى مرار الايام
مفتوحة فى جنبى الجراحات
م القسوة وكتر الطعنات
وان قولت ف يوم ان انا هابعد
تطاردنى بسرعة اللعنات
دلوقتى ..
أنا همشى واسيبكم
وان حتى صحيت ضمايركم
قررت خلاص ابقى لوحدى
واتصاحب على جرحى و ألمي
و ان جالى الموت انا مش خايف
راح اعدى قدامكوا و افوت
و اوعوا تحطونى فى تابوت
غطونى بكام ورقة توت

الليل كفيف : لـ | وليد حمدي اسرائيل

الليل كفيف
ما يقطع نظرته إلا..
عيون خفافيش
متربصه تسرق قلوب
القمر..
نوره انطفى
من قبل حتى ما يتولد
المطر
عرق الشوارع ف المِسا ..
ساعة ما باجري ف حضنها و ادَوَّر عليكي
***********
كل التفاصيل مسكونه بلعنه انا معرفهاش
جدران الأوضه ف عز البرد بتنشع خوف
الكرسي اللي ف آخر الصاله
وريحتك جواه
دبوس الطرحه اللي فاضلِّي
من آخر حضن
اللمبة اللى اترعشت فجأه
مع آخر بوسة اديتهالك
من يومها وسكناها الضلمه
مش عارف ليه
محتاج اتكلم وياكي
و ويايا كتير
مش فاضل حاجه أقولهالك
تصبحي على خير

قد إيه حلوه الحياه وعينيكي مش فيها : لـ | وليد حمدي اسرائيل

الورد كَشَّر
البحر أخضر
والنجوم عفاريت
عماله تتنطط
وقمر ..
بيغزل ستاير عتمه ع الملكوت
صوت العصافير على شباكي
كمنجات بتعيط
صوت الكروان ( الويل لك لك لك )
الشوارع كلها
مترشقه بعيون ذئاب
كل الجناين للأسف
صبحت مقابر لحكايات عشاق كتير
دقة خطاوي النمل جنبي دبابات مرعبه
الطبله لما بتنتشي
بتدق مارشات ف القلوب
دمع السحاب
وجع الشوارع
حلم جوه الزحمه تاه
قد إيه حلوه الحياه \ وعينيكي مش فيها !!

طلع من جواك إنسان : لـ | وليد حمدي اسرائيل

الجسر الممدود من روحك
للأموات ف العالم ده
ولا بيشوفوا الجسر ف مرة
ولا حاسين حتى الخطوات
و انت بتبعت ألف شعاع من روحك ليهم
بيفتش فيهم عن نور
فتلاقى الأرواح دى قبور
الحب اللى ما زارهم أبدآ
ولَّا لمسهم يوم ف منام
بتقدمه طول الأيام
و الجسر الممدود بمحبه
مش عايشين تفاصيلها معاك
فاتوضى بمحبة روحك
واتوصى بالقلب شوية
وافتح صدرك..
طلع من جواك إنسان
ساكنك ياما بقاله زمان
عدي بحور الخوف من تاني
وساعتها ع الشط التاني
هتلاقى للحب مكان

إيزيس الساكنه ف عنيكي: لـ | وليد حمدي اسرائيل

إيزيس الساكنه ف عنيكي بلعنتها
وسايبه طاقه مفتوحه ف حضن الروح
شعاع روحك بيدخل منها يأسرني
ياخدني لحضنك المفتوحه فيه توابيت
وبادفن روحي جواها
ضفاير شعرك الكرابيج بتجلدني
و لو حتى ف أحلامي
ف يوم
هانزل أنا الشارع
ألملم من وشوش أطفال
براءه أفك بيها السحر
وهاتخلص من الطلسم \ رموز سحرك
واحطم كل توابيتك
وتشرق شمس ف عيوني
حتشرق شمس غير شمسك