النص ماهوش مفهوم : لـ | وليد حمدي اسرائيل

ـــــــ 1 ــــــــ
فراغ النص بيحتم
قصيدة جديدة للفوضى
بدون إضاحات !!!
___ 2____
الغولة بقت بتخاف
من كل العفاريت ف الدولة
بلياتشو المسرح سلِّم بدموعه على الحاضرين
كان آخر يوم يتكلم
وسط الناس الساكتين
ومحدش قرر يضحك
غير اللي بوِش حزين
الغولة خلاص بتقرب
وبتدخل ع الكواليس
فتزيد العتمة وتخرج
من أوجاعك أباليس
كل العفاريت اتحدوا
لكن إبليس كان أذكى
قلِّد صوت المساكين
علشان يهرب م الغولة
ويسلِّم للعفاريت !!!
____3 ____
النص ماهوش مفهوم
ودا برضه لزوم الحبكة
وهروباً م القوانين !!!
ــــــــــ 4 ـــــــــ
وف آخر رمية زهر
الطاولة بتقفل يَك
وتدوب ف جوهار الدو
تتحايل ع الشيش بيش
مايجيش ولا مرة معاك
فتحل الخشب اللعنة
تقفل فجأة الطاولة عليك !!!
ــــــــــ 5 ــــــــــ
متأكد إنك مش فاهم
نفس شعوري وقت أما أكتب
لكن بعد قرايتي الأولى
بستنتج معنى الحرية !!!
ــــــــــ 6 ــــــــ
كباية الشاي اللي ف إيدك
دخان التبغ اللي ف دمك
وطموحك تهرب منك
مع صوت فيروز بيحلوا اللغز الأصعب فيك ..... ( انت ) !!!!