نجوم سابع سما : لـ | وليد حمدي اسرائيل

نجوم سابع سما أقرب من اللي بيبعدك عنه
ف ماتكملش ف السكادي
و اقطف نجمة ..
و ارجع بيها مجبور الفؤاد و الروح
و هادي الليل بروحك ..
و اشكره علشان ماحدش غيره بيساعك
و بوس خد السما علشان
بتمشيلك .. و بتقرب
ف وقت ما بيسيبوك وحدك شريد الفكر متغرب
وحيد .. ؟
طيب .. و ايه يعني ؟
غريب ؟
مين مش غريب فينا ؟
بلاد الغربة ف الآخر بلاد الله ..
بلاد الغربة متغطية بالسماوات
و فيها من الحاجات نفس الحاجات و اكتر
روايح ذكرياتك قيد .. و ريحة الغربة حرية
ف قول للغربة .. هامشيكي
هادوب وحشتك قبل اما ادوب فيكي
و غني بدون ما تتلفت و أبعد عن عيون الناس
غني .. هاتنفلت روحك
و هاتفرق مابين الماضي .. و الحاضر
و بين الورد و السكاكين
و هاتشوف اللي ضاق أوسع
و هاتشوف البراح براحين ..