أنا ليه ما ابطلكيش ؟
و اكسر وراك الناي
و اطلق كتايب جيش
على أي إحساس شوق و ادبح حروف " ازاي "
أنا ليه ما أقنعنيش
إنك صداع ممكن ينزاح ب ريفو و شاي
أو حسبة ناتجها .. لازم هايطلع فاي
أنا ليه ما أرحمنيش
من وصلك الكداب
و اتخبى جوة الذات و اقفل عليا الباب
و اتحامى بالضلمة من ضيك الغياب
أنا ليه ما اصبرنيش
بحاجات تكون أكتر ف الصبر من صبري
و ان هف يوم الشعر
و جبرني أكتبلك .. أكتب كلام عبري
أو انقب الخيالات .. تخجل عيون حبري
أنا ليه ما اكونش طاووس ؟
كبرك يموت مقهور من غيرته من كبري
أنا ليه ما احررنيش
من جوة أي فانوس .. بتدعكيه يلبي
و ابقى ايجابي ف يوم و معاك اكون سلبي
و تشرقي .. أمشي .. ف طريق يكون غربي
أنا ليه ما اغافلنيش و احجر على قلبي
أنا ميلتلك .. و انت .. بالسكة ميلتي بي
و سافرتلك .. و انت .. كيفك ف تغريبي
أنا غيبتلك عني .. كان سهل ليه تغيبي ؟
أنا ليه ما أفلتنيش ؟
قبل انت ما تسيبي
