أوِّل مشهد كان مِتعاد
بعد بروفة طويلة ما بينا
كل ما فيها كان بيقول
إن أنا و انتي .. كنا اخوات
بس المخرج فتِش فينا
شاف ف عنينا جملة اتحذفت جوه النص
بدِّل دوري بعد ما بص بعينه فـ قلبي
و شاف المشهد اصدَق لما
انطق جملة " إني بحبك "
لمّا كسوفِك كان بيفتَّح
كل ستاير المسرح ليّا لجل ما ابوح
نبض قلوبنا اتشكل بينَّا صوت مزيكا ف ضَهر المشهد
و الجمهور بيصقف فرحة
أول مَرَّة اقولها صراحة
كإنِّي بأدِّن ليكي و بيكي
فـ أرض لأول مره بتسمع
لو راح نرجع مره بروفة
كنت هقولها و اغير دوري قبل ما هقرا كلام النَص
نفس المشهد بينَّا اتغير بعد ما قلبي بقلبك حَس
