كَربونِة الأيام
عجناني فْـ التفاصيل
تِشهَق سكوتي كلام
و الحِمل بَرضُه تَقيل
يا مزيفة الساعة
الوقت ما يساعَه
عقرب خُطاكي بَرَكْ
و لِسَّاكى لسَّاعه
و سنيني مِتباعة
رغم إني مش بايع
و شروقي متأخِر
و انا شمسي تتمايع
يا صوت صهيل الجرس
رَكِبنى فوق مُوجَك / لقِّحنى فْـ الطوابير
بحر العساكر خرَس
دوامتُه زي زئير
يا اللي حفرتوا البير
صَبْر الطُرمبة نَفَد
دى المية واقفة السير
و خريرها فيَّا نَفَد
غرَّق شراقي البوح
حفَّر فْـ صَدري نفق
يا عَقدنا اللى اِتفَق
( سَطر الصراحة وضوح )
خِلِف الخِلاف بيِّن
قُبح اللى صار مَفضوح
يا وشوش حروف إسمى
ما بقيتي متطاقه
مِتسلسِلة فـ الجيب
حبسانى فْـ بطاقة
يا حِلمي يا ناقة
لبنَك ما عاد يشفي
وجِبال سِنام ظهرَك
تحويشها ما يكفى
يارب خلِّصني
مِن صَحرِةِ التفكير
و اوهبنى غيط اخضر
وفْـ طينُه شتلِة خير
اَرويها مِن بُكرة
وابني لى عِش صِغِيرْ
