استربتيز : لـ | وليد حمدي اسرائيل

مشهد واحد :-
دولة ماشية بقميص النوم ..
بيعاكسها اتنين شباب غاويين تحرش ..
واحد منهم جر كلام ..
والتاني نادورجي ..
علشان دورية نص الليل ..
ما تبوظش الكادر !!!
مشهد مالهوش أرقام :-
دولة بتقبل أول سيجارة ممدودلها من إيد مرعوشة وبادرة ..
بتولع من أوجاعها عودين كبريت ..
لكن ..
نيكوتين العالم رافض ..
دخانها يطير !!!
مشهد تاني مالهش لزوم :-
الكاميرا بتعمل Zoom على لون المانيكير ف إيديها ..
وبتنقل من جوا العتمة حاجات أوضح م الموت بكتير ..
الدولة بتصرخ ..
Cut ..
Close ..
افتح آخر كادر لطوبة ..
السما بتمطر ..
عفاريت ..
وعيال ..
واستقلال ..
وهزيمة ..
السما بتمطر ..
حرية مسجونة بفعل الإخراج !!!
مشهد متعاد ومكرر :-
البطلة بتضحك ببساطة ..
وأسود الكورنيش بتعيط ..
ومافيش أبطال ف المشهد ..
غير الدهشة ..
وقميص النوم ..
مانيكير أحمر ..
خصلة شعر ..
نيكوتين محروق ..
ريحة مطرة ..
وأنا بره المشهد ..
بكتب تتر يليق بالقهر ..